Bəzən uşaq ananın bir döşünə (sağ və ya sol döşə) üstünlük verir. Bunun bir neçə səbəbi ola bilər. Ana bir qolunu daha güclü bilir, uşağı bir tərəfində daha rahat tutur, yaxud sağ əlini iş görmək üçün boş saxlayır (uşağa sol döşünü verir). Nəticədə uşaq həmin tərəfdən qidalanmağa alışır. Bu ananın bir döşündə (uşağın əmmədiyi döşdə) südün azalmasına səbəb olur.
Ancaq bilin ki, bunun bir neçə fəsadı ola bilər. Uşaq birtərəfli qidalananda boyun əzələsinin bir hissəsi normal inkişaf etməyə bilər. Siz uşağı oturtsanız, onun başının döş verilməyən tərəfə əyildiyini görərsiniz.
Bundan başqa, uşaq birtərəfli qidalananda anada əyrilik olur, ana bədənini bir tərəfə əyməyə başlayır. Yaxud döşündən biri o birinə nisbətən kiçilir.
Odur ki, uşağa hər iki döşünüzü verməyə çalışın. Gecikmisinizsə, döşünüzün birində süd əmələ gəlmirsə, uşaq yeməyəndə südü sağmağa çalışın. Yaxud uşaq acanda əvvəl ona istəmədiyi döşü verin.
Bəzən uşağın özünün inkişafında problem olduğu üçün ananın döşlərindən birinə üstünlük verir. Odur ki, belə halda mütləq həkimə müraciət edin, problemin əsil səbəbini tapmağa çalışın.
