İndi balanızın çəkisi 4-5 q, uzunluğu təxminən 3-4 sm-dir. O, uşağlığın divarına dəyəndə geri atılır! Hərçənd siz bunu hiss etmirsiniz.
Hamiləliyin 10-cu həftəsində uşağın mərkəzi sinir sistemi fəaliyyətə başlayır. Kələ beyni artıq böyük adamın beyninə oxşayır. İndi uşağın beyninin bütün hissələrində dəqiqədə 250 min neyron əmələ gəlməkdədir. Odur ki, bu həftə yeməyinizə xüsusi diqqət etməlisiniz. Qan dövranınızı yaxşılaşdırmaq üçün C və P vitamini ilə zəngin ərzaq məhsullarına üstünlük verilməlidir. Sitrus meyvələri, pomidor, kələm, bolqar bibəri, qarabaşaq, itburnu dəmləməsi, qarağat, quşarmudu, ərik—bunlar hamısı C və P vitamini ilə zəngindir. Siz düzgün qidalansanız, balanız sağlam olar.
Hamiləliyin 10-cu həftəsi embrional dövrün sonudur. Yəni uşağın orqanlarının çoxu, əl-ayağı formalaşıb. İndiyə qədər döl ətraf təsirlərə çox həssas idi. Məsələn, uşağın ürəyində problem varsa, deməli ananın hamiləliyin 10-cu həftəsinə qədərki dövrdə nə isə baş verib. 10-cu həftədən yeni mərhələ başlayır. Amma bu o demək deyil ki, siz arxayın ola bilərsiniz. Yeməyinizə, sağlamlığınıza yenə diqqət etməlisiniz. Elə şeylər var ki, dölün inkişafına bundan sonra da pis təsir göstərə bilər.
10-cu həftədən sonra döl sürətlə inikişaf edib, çəkisini və ölçüsünü artıracaq. İndi 4 qramdan çox olmayan balanız 3200-3600 qrama çatmalıdır. Uzunluğu 4 sm-dən 50-52 sm-ə qədər artmalıdır. Bunun üçün siz kifayət qədər, həm də düzgün qidalanmalısınız.
Hamiləliyin 10-cu həftəsində balanıza həm də çox hərəkət etməklə xeyir verə bilərsiniz. Ən yaxşısı idman və gəzintidir. Gəzinti zamanı sizin əzələlərinizin 97%-i fəaliyyətdə olur, nəticədə ağırlıq bərabər şəkildə paylanır. Gündə azı 2 saat gəzin. Gəzmək üçün sakit, adamların az olduğu, havanın təmiz olduğu yerləri seçin. Musiqi yerinə quşların, yarpaqların səsini eşitsəniz, daha yaxşı olar, həm bədəniniz, həm də beyniniz dincələr. Gəzməkdən başqa vaxtaşırı idman edin (Hamilə və idman bölməsinə baxın).
Sizin çəkiniz hələ dəyişməyib. Hamilə olduğunuz da yəqin ki, hələ bilinmir. Hamilə paltarı almaq hələ tezdir.
Hələ də ürəyiniz bulanırsa, qusursunuzsa, narahat olmayın. Bir-iki həftə də dözün, düzələcəksiniz (qadınların çoxunda toksikoz 12-ci həftədən sonra keçib-gedir).
