Bu həftə balanız ətraf aləmlə ünsiyyətə başlayır! O, çox aktivdir, yerini tez-tez dəyişir, ayağını ayağının üstünə qoyur, mayallaq aşır, bəzən sizi “təpikləyir”. İndi o, səslərə reaksiya verir. Ürəyinizin döyüntüsü, qan damarlarınzıın səsi onu narahat etmir, ancaq sizin ətrafınızda möhkəm səs olarsa, uşaq qorxa bilər. Araşdrımalar nəticəsində müəyyən olunub ki, güclü səs olanda bətndəki uşaq ya narahat hərəkətlər etməyə başlayır, ya da gərginlikdən yığılır.
Balanızın uzunluğu indi 20-22 sm-dir, çəkisi 200 q! Onun göz qapaqları yavaş-yavaş açılır, üz cizgiləri daha da aydınlaşır. Barmaqlarının uclarında yalnız ona məxsus olan naxışlar yaranmaqdadır. (Hər kəsin əl izi məhz barmağının ucundakı individual naxışlara əsasən müəyyən olunur).
Hamiləliyin 18-ci həftəsində balanızın ürəyinin fəaliyyəti güclənir, qan təzyiqi artır, qan dövranı sürətlənir. Nəticədə uşağın qanında oksigenin və başqa qidalandırıcı maddələrin miqdarı artır.
Sizin orqanizminizin indi dəmirə ehtiyacı çoxdur, çünki qan dövranı güclənib və daha da güclənməkdədir. Tərkibində dəmir olan ərzaq məhsulları (ət, balıq, kəsmik, yumurta, alma, kök və s.) ilə qidalanmaq vacibdir. Apteklərdə vitaminlər satılır, ancaq aptekdən aldıqlarınızı həkim məsləhəti olmadan qəbul etməyin.
Hamiləliyin 18-ci həftəsində belinizdə ağrılar hiss edə bilərsiniz. Bel ağrısı fiziki yükün artmasıyla bağlıdır. Adətən yüngül olur, hamiləliyin son günlərində artır. Bəzi qadınlar bel ağrısını yalnız hamiləliyin sonunda hiss edir. Bel ağrılarının qarşısını almaq üçün yanı üstə yatın, gündüzlər istirahət edin, uzanın. Ayaq üstə çox gəzməyin. İdman edin, çalışın, çəkiniz həddi aşmasın.
Döşünüzdən sarımtıl maye axırsa, ehtiyatla silin. Axan süd ağzıdır. Döşünüzü heç vaxt sıxmayın!
