Azərbaycanda Respublika Doğum Evinin bazasında Respublika Perinatal Mərkəzi yaradılır. Mərkəzə Ə.Qarayev adına uşaq kliniki xəstəxanasının reanimasiya şöbəsinin müdiri vəzifəsində çalışmış Əzim Süleyman oğlu Nağdəliyev rəhbər təyin olunub.
Müasir avadanlıqla təchiz olunan mərkəzdə xəstələrin doğumdan əvvəlki geniş spektr müayinəsi və müalicəsi aparılmalı, hamiləliyin normal keçməsi təmin olunmalı, perinatal dövrün patologiyası olan qadınlara və yenidoğulmuşlara stasionar tibbi xidmət, xəstə yenidoğulmuşlara reanimasiya və reabilitasiya yardımı, hamilə qadınlara tibbi-psixoloji yardım göstərilməlidir.
120 çarpayılıq Mərkəzdə 125 həkim - ginekoloq, terapevtlər, mamoloq, cərrah və ultrasəs müayinəsi həkimləri xidmət göstərəcək. Tibb müəssisəsinin yaradılması hamilə qadınlara və yeni doğulmuş körpələrə tibbi yardımın keyfiyyətini yaxşılaşdırmağı, ana və uşağın sağlamlığının qorunması məsələsini keyfiyyətcə yeni səviyyəyə qaldırmağa imkan verməlidir.
Azərbaycan Səhiyyə Nazirliyindən mətbuata verilən məlumata görə Respublika Perinatal Mərkəzinin açılışı yaxın vaxtlarda baş tutacaq.
