Gələcək körpənizin corabının rəngini daha tez seçə bilərsiniz. Indi uşağın cinsini hamiləliyin 5-ci həftəsində də bilmək mümkündür! Amsterdam (Hollandiya) alimlərinin yeni kəşfi buna imkan verir.
İndiyə qədər valideynlər uşağın cinsini bilmək üçün hamiləliyin 12-13-cü həftəsini gözləyirdilər (USM müayinə). Çox tələsənlər hamiləliyin ilkin dövrlərində dölətrafı mayedən nümunə götürülməsinə razılıq verirdilər ki, bu da təhlükəli prosedur hesab olunur.
Ancaq indi hamiləliyin 5-ci həftəsində ananın qanından götürülən nümunə kifayət edir ki, dölün cinsi müəyyən olsun. Analizin nəticəsini bilmək üçün cəmi 4 gün gözləmək lazımdır.
Hazırda alimlər laboratoriyada təcrübə aparırlar, amma əmindirlər ki, yaxın vaxtda cinsi müəyyən edən testləri apteklərə çıxara biləcəklər.
Mütəxəssislər deyirlər ki, yeni kəşf dölün cinsini tez öyrənməkdən başqa, bəzi irsi xəstəliklərin qarşısını vaxtında almağa imkan verəcək.
