Oktyabrın 21-də Malaziyada təyyarədə uşaq doğulub. 31 yaşlı ana Lyu So Xsyanın sancısı tutanda təyyarə havada olub. Təyyarədəki həkimin və stüardessaların köməyi ilə qadın doğub, amma təyyarə mənzil başına deyil, təcili olaraq paytaxta enib. Xəstəxanaya çatdırılan ananın da, oğlunun da vəziyyəti yaxşıdır.
Hadisənin baş verdiyi təyyarə "AirAsia" şirkətinə məxsusmuş. Şirkət hədiyyə olaraq həm uşaq, həm də anasına ömürlük pulsuz uçuş haqqı verdiyini elan edib.
Bu, nadir hadisə deyil. Keçən il "Finnair" şirkətinə məxsus təyyarədə bir isveçrəli qadının qızı olub. 11 min metrlik hündürlükdə qadının bəxti gətirib, təyyarədə 2 həkim, 2 tibb bacısı varmış.
Əslində aviaşirkətlərin çoxu hamilə qadınlara bilet satmaqdan çəkinir. Bəzi şirkətlər hamiləliyi 36-cı həftəni keçmiş qadınlara heç bilet vermir. Bəzi şirkətlər yalnız həkimin müşaiyət edəcəyi hamilələrə bilet satırlar.
